Dossier

Pulpiño Viascón é un músico multi-instrumentista e clown. A súa traxectoria musical pasa por moitos grupos e por moitos espectáculos de música e de circo de rúa.

Pulpiño Viascón comezou a súa andaina no mundo da música ao redor dos 16 anos, na Coruña, co seu primeiro grupo PARADA DISCRECIONAL, sendo o seu estilo musical un punk feito con retranca galega. Chega a ser así, compoñente dun dos grupos que na década dos oitenta saían ás rúas e aos bares a facer os seus concertos con grupos naqueles intres como RADIO OCÉANO ou OS RESENTIDOS.

No seguinte proxecto que se embarcou, e sendo tamén partícipe da súa formación foi a banda OS VERGHALLUDOS, grupo mítico que contaba na súa formación cunha gaita, unha guitarra e unha batería, sendo o seu estilo un punk-folk feito na Galiza e tamén en galego. Os Verghalludos é un dos primeiros grupos da Galiza que empeza a percorrer o estado español cos seus directos, sendo os seus sitios favoritos os locais sociais ocupados de Madrid, Euskadi, Valencia, Catalunya, Andalucía, etc. Os músicos que formaban parte da banda a parte de Pulpiño, tamén estaban na guitarra Nacho Garbanzo e Cuca na gaita, Pulpiño na batería e tamén a voz principal da banda. Os Verghalludos nos anos noventa foron chamados polo músico, director de cine e guionista Antón Reixa, para o seu programa da TVG Sitio Distinto e gravar 3 cancións para dito programa.

Despois da disolución dos verghalludos, Pulpiño Viascón empezou a formar parte de OS DIPLOMÁTICOS DE MONTE ALTO, grupo con bastante repercusión no denominado Rock Bravú. Neste grupo Pulpiño involucrouse na gravación de dous discos, PARRÚS e AVANTE TODA!, discos que tiveron unha saída importante no mercado do estado español. Un deles foi gravado nos estudos de Kaki Azkarazo participando nel os membros de Negu Gorriak. Pulpiño Viascón estaba na batería, nas voces e tamén era un membro dos máis importantes dentro da banda na composición dos temas, estaba acompañado por Xurxo Souto na voz principal, Rómulo Sanjurjo acordeón, Mangüi ao baixo eléctrico e Guni Varela na guitarra eléctrica. Este grupo marcou tendencia no panorama musical galego sendo un dos pioneiros en exportar ao mundo a música feita en Galego con bases do rock, punk, ska, e música popular galega. Participaron en proxectos musicais como na Unión Bravú, Selección Galega xa!, ou na Feira das Mentiras de Compostela. Este grupo compartiu escenario por todo o estado e por Galiza con bandas como Mano Negra, Toy Dolls, Negu Gorriak, Os Resentidos, Siniestro Total, Todos Tus Muertos, Banda Bassoti, entre outros.

Despois de ser partícipe de todos estes proxectos musicais, decide marchar para Holanda, alí participa como músico multi-instrumentista en varias bandas locais de música electrónica. Despois marcha para Alemaña e alí tamén participa en varios proxectos musicais, con xente de “guts pie heartsow”.

A partir de aquí, Pulpiño Viascón, atópase en Alemaña con xente dos Verghalludos, concretamente con Nacho Garbanzo, que estaba empezando a preparar o proxecto JARBANZO NEGRO. Neste proxecto, o cal empezou en serio a partir da unión de Pulpiño e Nacho, foron quenes de xuntar a Tanja no saxo e no acordeón, Uli ao baixo e a Paquiño, o gaiteiro de Cáceres, e embarcalos no Jarbanzo Negro. Empezan a ensaiar no local social okupado “EXZESS” de Frankfurt(Alemaña) sendo os seus primeiros bolos en Alemaña. Estando xa unidos e vendo que a banda funcionaba e gustaba volven a Amsterdam a tocar, sendo o seu principal motivo cultural a música na rúa. Alí en Amsterdan tiveron os seus primeiros contactos co mundo circense, no cal deciden embarcarse e marcharon para Suiza onde o JARBANZO NEGRO segue a facer os seus bolos e teatro de circo. Rematada a súa labor co circo Kran e deciden marchar para Barcelona onde se instalan no Circo Rogelio Rivel, no Ateneu Popular Nou Barris.

O Jarbanzo Negro comeza a despuntar no panorama musical do estado, e chegando a Barcelona co seu primeiro disco gravado “TERRA WHIT OUT GREZEN” comezan a popularizarse na maior parte de tódolos festivais do estado. O gaiteiro de Cáceres abandona a formación e únese a eles o gaiteiro dos Papaqueixos, Xan. Gravan o seu segundo traballo discográfico “BUSCAVIDAS” con Kaki Azkarazo, traballo co cal conseguen consagrarse por toda Europa nos mellores festivais de música. Tiveron un ano no que os 100 concertos chegáron-lle a pouco, tocando en Alemaña, Suíza, Francia, Bosnia, Reino Unido, Finlandia, Italia, Catalunya, Euskadi, Galiza, Bélxica...

Pulpiño Viascón despois de 9 anos co Jarbanzo Negro decide volver para Galiza e aquí facer novos proxectos, involúcrase na banda de Paco Lodeiro LA SONORA CALLEJERA, en BONOVO, grupo que forman actualmente Oscar Cempés e Roberto Grandal, tamén forma parte do grupo de música electrónica GalegoZ. Pulpiño participa como músico clown en espectáculos da carpa do Cultura Circula con Chévere e no espectáculo teatral FIESTAS POPULARES da compañía de teatro de Barcelona que fundou xente que formaron parte da Fura dels Baus coma Juan Navarro. Pulpiño segue a facer música con colaboracións en discos e concertos con Manu Chao, Tonino Carotone, Susana Seivane, Josele Santiago, Pablo Novoa, Mastretta, Sagarroi, Miguel Malla, etc.

Participa no concurso da Radio Galega APOLOGHIT co tema IN THE OCEAN polo cal consigue a canción máis popular do verán en Galiza do 2006, recoñecida polos medios e mais a popularidade das persoas, gravou o vídeo do tema IN THE OCEAN nos estudios da TVG coa produción de dito medio televisivo.

E aquí a idea de formar unha banda de músicos con Fran Amil a batería, excompoñente do grupo OS PAPAQUEIXOS, de OS DIPLOMATICOS, e actualmente en OS TRES TREBÓNS. Miguelón Ladrón De Guevara na guitarra e coros, con gran traxectoria no panorama musical galego como LA SONORA CALLEJERA, A CARICIA DA SERPE e LA RUMBA ATLÁNTICA. Mangüi, excompoñente de OS DIPLOMATICOS DE MONTEALTO, ao baixo electrico, e Fran aos teclados e coros.

A BANDA DE PULPIÑO VIASCÓN está collendo popularidade nos seus concertos e nas súas actuacións na TVG polo seu directo festeiro e contundente. O seu estilo musical abarca dende a rumba, o ska, o punk, o folc ou as rancheras, sendo todos estes estilos primordiais para un directo cargado de música para calquer festival. No seu directo tamén se atopan sorpresas coma a interpretación de cancións co serrucho, con acordeón, coa gaita e ca súa voz chea de enerxía.

Neste ano Pulpiño Viascón e a súa banda percorrerá tódolos festivais posibles mostrando o seu explosivo directo.